Սթրեսից ազատվելու 3 քայլ. news.am

Սթրեսային իրավիճակների հետ գրեթե բոլորն են առնչվում, եւ ոչ միայն մարդիկ, այլեւ կենդանիները: Ոչ մեծ սթրեսը նույնիսկ օգտակար է օրգանիզմի համար, քանի որ ստիպում է նրան մոբիլիզացնել իր ուժերը եւ ավելի արդյունավետ գործել, սակայն շարունակական սթրեսը կարող է լուրջ խնդիրներ ստեղծել, ընդ որում, թե´ հոգեբանական, թե´ ֆիզիկական:

Սթրեսն ավելի արդյունավետորեն հաղթահարելու համար Հայկական հոգեբուժական ասոցիացիայի նախագահ Արմեն Սողոյանը խորհուրդ է տալիս հետեւյալը.

1. Եթե Դուք հայտնվել եք Ձեզ մոտ սթրես առաջացնող իրավիճակում, առաջին հերթին պետք է անել ամեն հնարավորը՝ իրավիճակը փոխելու այնպես, ինչպես Դուք եք ցանկանում:

2. Եթե անհնար է փոխել իրավիճակը, ստիպված կլինեք փոխել դրա հանդեպ վերաբերմունքը: Փորձեք խնդիրն այլ տեսանկյունից դիտել: Արեք ամեն հնարավորը, որպեսզի այն դադարի Ձեզ առաջվա պես ուժեղ անհանգստացնել:

«Եթե մենք չենք կարող փոխել աշխարհը, անհրաժեշտ է փոխել մեր վերաբերմունքն աշխարհի նկատմամբ: Այս մոտեցումն արդիական է բոլոր իրավիճակներում: Եթե խնդիր կա, այն պետք է լուծել: Եթե անհնար է այն լուծել, պետք է հաշտվել եւ սովորել ապրել դրա հետ»,-բացատրել է հոգեբույժը:

3. Եթե ամեն դեպքում Դուք սթրես եք տանում, անհրաժեշտ է մտածել դրա՝ Ձեր առողջության վրա դրա ազդեցությունը մեղմելու մասին: Եթե ինքնուրույն չի հաջողվում դա անել, պետք է դիմել մասնագետին:

Օրինակ՝ մեր օրերում շատ հայերի համար սթրեսի պատճառ է գումարի հետամանորյա պակասը: Այդպիսի իրավիճակում մարդը պետք է կամ գումար ձեռքբերելու միջոց գտնի, կամ էլ հաշտվի դրա պակասի հետ: Եթե նա գումարն այնպիսի ճանապարհով ձեռք բերի, որը հետագայում նրան էլ ավելի շատ սթրես կպատճառի, ավելի ճիշտ կլինի ադեկվատորեն գնահատել իրավիճակը եւ ավելի հարմար որոշում գտնել կամ էլ դեռ հաշտվել դժվարությունների հետ՝ փոխելով դրանց հանդեպ վերաբերմունքը:

Հարցեր, պատասխաններ, մեկնաբանություններ